सप्तरीमा छोराको बञ्चरो प्रहारबाट बुबाको मृत्यु

सप्तरीमा छोराले बञ्चरो प्रहार गरी बुबाको हत्या गरेका छन् । घरायसी बिबादमा सप्तकोशी नगरपालिका ३ का ४५ वर्षीय हिराइ सदाको हत्या भएको हो । उनका छोरा २२ वर्षीय लालदेव सदाले बन्चरो घाँटीमा प्रहार गर्दा घटनास्थलमै मृत्यु भएको सप्तरीका प्रहरी प्रवक्ता डिएसपी ढुण्डीराज न्यौपानेले जानकारी दिएका छन । बुवालाई बन्चरो प्रहार गर्दै गरेको देखेर बचाउन गएका छिमेकी दशन सदा माथि समेत लालदेवले आक्रमण गरी घाईते बनाएको र उनको फत्तेपुर स्थित गोल्डेन अस्पतालमा उपचार भइरहेको डिएसपी रायले जानकारी दिएका छन । आईन्दा कुटपिट र झै– झगडा नगर्ने शर्तमा अभिभावकको रोहबरमा प्रहरीबाट छाडिएका लालदेवले त्यसको १२ घण्टा नबित्दै आफ्नै बुवाको हत्या गरेका हुन । मदिरा तथा लागू औषधको कुलतमा फसेका लालदेवलाई सो कुलत त्याग्न र झै–झगडा नगर्न सम्झाउन खोज्दा आवेशमा आएर अचानक बन्चरो प्रहार गर्न थालेको स्थानीयहरुले बताएका छन । बन्चरो प्रहार गर्ने लालदेवलाई बन्चरो सहित नियन्त्रणमा लिएर थप अनुसन्धान गरिरहेको जिल्ला प्रहरी कार्यालय सप्तरीले जनाएको छ ।