सीता राम विवाह पञ्चमी अन्तर्गत आज पहिलो पटक भारतको अयोध्यामा भगवान श्रीरामको तिलकोत्सव भएको छ। तिलकोत्सवका लागि मधेशका मुख्यमन्त्री सतिश सिंह, मन्त्रीहरु, जानकी मन्दिरका छोटा महन्त राम रोषण दास र विश्व हिन्दू परिषद्को टोली अयोध्या पुगेको हो । अयोध्या पुगेका उक्त टोलीको नेतृत्व मुख्यमन्त्री सिंहले गरेका हुन् ।
राम सेवकपुरम् अयोध्यामा तिलकोत्सव समारोह गरिएको र माता सीताको अभिभावकको भूमिकामा मुख्यमन्त्री सिंह र छोटा महन्त दास रजलक पुरधाम उपमहानगरपालिकाका मेयर मनोज कुमार शाह बसेका हुन्।श्रीराम मन्दिर ट्रष्टका सचिव चम्पत राय भगवान श्रीरामको अभिभावकको भूमिकामा छन् । दुवैतर्फका प्रतिनिधिलाई राखेर पण्डितले मन्त्रोचारण गरी तिलकोत्सव गरेको हो ।
विवाह अगाडि बेहुलीको आफन्त बेहुलाको घर पुगेर तिलकोत्सव गरिने चलन रहेको छ । त्रेता युगमा भगवान श्रीराम र माता सीता बीच विवाह भएको थियो । त्यसकै सम्झनामा जनकपुर धाममा हरेक वर्ष विवाह पञ्चमी विशेष धुमधामका साथ मनाइने गरिन्छ ।
भारतको उत्तर प्रदेशमा पर्ने अयोध्या भगवान रामको जन्मभूमि रहेकोले त्यहाँबाट हरेक पाँच पाँच वर्षमा जनकपुर धाम जन्ती आउने गरेका छन । यसवर्ष पनि अयोध्याबाट जन्ती आउने भएका हुन ।
विवाह पञ्चमी मंसिर २१ गते परेको छ । अयोध्याबाट जन्ती मंसिर १८ गते आइपुग्नेछन भने जन्ती चार दिन जनकपुरधाममा बसेर मंसिर २२ गते अयोध्या फर्किनेछन ।
