रोवर्ट लेवान्डोस्कीले आफ्नो लय कायम राख्दै दुई गोल गरेपछि बार्सिलोनाले युरोपियन च्याम्पियन्स लिगमा रेड स्टार बेल ग्रेडलाई ५ २ ले पराजित गरेको छ ।
च्याम्पियन्स लिगमा बार्सिलोनाको यो लगातार तेस्रो जित रहेको हो । यस्तै बेलग्रेड विरुद्धको दुई गोलपछि च्याम्पियन्स लिगमा लेवान्डोस्कीको गोल संख्या ९९ पुगेको छ । अब उनलाई च्याम्पियन्स लिगमा एक सय गोल पूरा गर्न एक गोल आवश्यक रहेको छ ।
३६ वर्षीय लेवान्डवस्कीले यस सिजन सबै खाले प्रतियोगितामा गरेर १६ खेलमा १९ गोल गरेका छन् । बेलग्रेडको मैदानमा भएको खेलमा लेवान्डोस्कीले ४३औं र ५३औं मिनेटमा गोल गरेका थिए । त्यसअघि इनिगो मार्टिनेजले १३औं मिनेटमा गोल गर्दै बार्सिलोनालाई अग्रता दिलाएका थिए ।
२७औं मिनेटमा मातोम्पा एम भुम्पाले बेलग्रेडका लागि बराबरी गोल फर्काएपछि लेवान्डोस्कीको लगागातार दुई गोलपछि बार्सिलोनाले ३ १ को अग्रता बनाएको थियो । त्यसपछि कप्तान राफिन्हाले ५५ औं र फर्मिन लोपेजले ७६औं मिनेटमा गोल गर्दै बार्सिलोनालाई सहज जित दिलाएका हुन ।
लगातार तेस्रो जितपछि बार्सिलोना ४ खेलबाट ९ अंक जोडेर छैटौं स्थानमा उक्लेको छ । पहिलो खेलमै मोनाकोसँग पराजित भएको बार्सिलोनाले त्यसयता योङ ब्वाइज र बायर्न म्युनिखलाई पनि हराएका थिए ।
