धनुषामा नहरमा मृत अवस्थामा एक युवतिको शव फेला परेको छ । धनुषाको कमला नगरपालिका वडा नम्बर २ सराबे र जनकनन्दनी गाउँपालिका वडा नम्बर ४ खजुरीको बीचमा पर्ने नहरमा एक किशोरीको शव फेला परेको हो ।
नहरमा बोरामा बाँधेर फालिएको अवस्थामा अन्दाजी १८ वर्षीया किशोरीको शव फेला परेको छ । प्रहरीले किशोरीको घाँटीमा धारिलो हतियार प्रहार भएको र दुबै खुट्टा बाँधिएको अवस्थामा किशोरीको शव फेला परेको जनाएका छन ।
धान काट्न गएका किसानले नहरमा शंकास्पद अवस्थामा बोरा देखेपछि प्रहरीलाई खबर गरेका थिए । ईलाका प्रहरी कार्यालय खजुरीको टोली घटनास्थल पुगेर शव बाहिर निकालेको हो ।
घटनास्थलमा जिल्ला प्रहरी कार्यालयबाट तालिम प्राप्त कुकुर सहितको टोली पुगेर अनुसन्धान गरिएको थियो । किशोरीको पहिचान भने हुन नसकेको प्रहरीले जनाएका छन ।
