कैलालीमा सर्पको टोकाइबाट दुई बालिकाको मृत्यु भएको छ भने एक वृद्धा घाइते भएकँ छन । गौरीगङ्गा नगरपालिका वडा नम्बर ७ मौलियामा एउटै विस्तारमा सुतेका दुई नातिनी र बजैलाई सर्पले डसेको जनाइएको हो ।
शुक्रवार राती सर्पको डसाइबाट छ बर्षीया काजल घर्तिमगर र चार बर्षीया लीला घर्तिमगरको निधन भएको छ भने अन्दाजी ६७ बर्षीय रिजु घर्तिमगरको सेती प्रादेशिक अस्पताल धनगढीमा उपचार भई रहेको स्थानीय शङ्कर पुन मगरले बताएका हुन ।
उहाँका अनुसार झुल नलगाई खाटमा संगै सुतेका बालिकालाई पहिला टोकेर वृद्ध महिलालाई टोकेपछि उहाँ बिउँझनु भएको र तुरुन्तै सर्प दंश उपचार केन्द्र बडैपुर लगिएको थियो । बालिकाहरूलाई टोकेकोले उनीहरू बान्ता गर्न थालेपछि मात्र थाहा भएको र ढिला अस्पताल पुर्याउदा मृत्यु भएको बताइएको हो । तीन बर्ष पहिला छारे रोगबाट बुबाको मृत्यु भई सकेका बालिकाहरूको आमा रोजगारका लागि विदेश जाने तयारीमा काठमाडौँ गएपछि बालिकाहरू बाजे बजैको संरक्षणमा बस्दै आएको स्थानीय पुन मगरले जानकारी दिएका छन ।
